Galtzagorri Elkartearen webgunea

Irakurketa mintegia

Azalpena:

Galtzagorri Elkartea sortu zenetik, Haur eta Gazte Literaturaren inguruan lanean dabiltzan hainbat profesionalek aholkularitza gune gisa erabili dute. Sarri, liburuzain, irakasle eta hezitzaileek Galtzagorrira jotzen dute euskarazko Haur eta Gazte Literaturaren alorrean dituzten zalantzak argitze aldera.  Urte guzti hauetan behar horri erantzuten saiatu da Galtzagorri, beti ere, elkartekide direnen borondate ona bidelagun hartuta.

Historia laburra

 2005ean, eskari eta galderen gorakada ikusirik, Euskal Haur eta Gazte Literaturako Irakurketa Mintegia osatu zen. 2005eko urtarrilaren 9an elkartu zen lehen aldiz, urteetako hausnarketa lan bati erantzunez. 2006an Euskal Haur eta Gazte Literaturako Jarraipen  Taldeak ezinbesteko lan horri jarraipena eta sendotasuna eman zion.

2007an berriz, Irakurketa Mintegi honek pauso bat gehiago eman zuen: Haur eta Gazte Literaturan argitaratutako liburuak irakurtzeaz gain, formazioa eskaintzera igaro zelako. Horrela, egitarau zehatz baten bidez, Jarraipen Taldea indartu eta zabaldu nahi izan genuen, hain zuzen aipatutako behar horiei erantzunez.

Horretarako, Itziar Zubizarreta idazle eta ipuin kontalariak egitaraua prestatu eta koordinatu zuen 2007an lehenengo aldiz.  Gaur egun Galtzagorriko kide talde bat biltzen da hilero larunbat goiz batez, Zubizarretaren gidaritzapean. Besteak beste, liburuzainak, irakasleak eta dinamizatzaileak biltzen dira: literatur zaletuak izateaz gain, beraien lanetan argitaratutako azken liburuen irakurketa eta azterketaren beharra dutenak, hain zuzen. Izan ere, beraien jardunean sarri hauei buruzko informazioa falta zaie ekintzak burutu edo prestatzeko garaian.

Prozedura

Egitarauak hamar saio izango ditu guztira 2007an. Urte honetako urtarrilean hasi ziren saioak eta abendura arte luzatuko dira. Hilero larunbat batean burutzen dira saioak Galtzagorriko egoitzan. Hiru orduko saioak dira goizez, eta bertan, 2 eta 11 urte bitarteko haurrentzat euskaraz argitaratutako guztia irakurtzeaz gain, ozenkiko irakurketetan, haur literaturako liburuen eta autoreen ezagutzan… formatzen dira partaideak.

Metodologia 

Saio bakoitza bitan banatzen da:

-Lehenengo zatian, hurrengo saioko liburuen zerrendak banatu eta irakurri diren liburuen iruzkin literarioak egiten dira. 

-Bigarren zatian, formazioari heltzen zaio.  Besteak beste, formazioan honako atalok lantzen dira:

a) Irakurketa adierazkorrak eta ipuin kontaketak.

b) Haur poesia; ezaugarriak eta erabilpena.

c) Albumen aurkezpena eta irakurketa; irudien irakurketa.

d) Haur liburuen ezaugarriak: deskribapenezko adierazle zehatz batzuen bila.

e) Liburuen aurkezpen motza: ahozkoa eta idatzizkoa.

 

Helburuak

a) Galtzagorrik dituen hainbat eginkizunei aurre egiteko prestatzea: Liburu Gaztea, Liburuen Altxorra, Behinola aldizkariko erreseinak eta web gunea modu egokian prestatzeko baliatuko dugu urteroko mintegia; hainbat lehiaketetarako  zerrendak eta hautagaiak prestatzen laguntzeko balioko digu; aholkularitza deiei behar bezala erantzuteko prestatzeko ere baliatuko dugu; azkenik, EHGLaren esparruan dauden beharrei buruz hausnarketa egiteko baliagarri izango zaigu, egitarauan esparru honetako alderdi ezberdinetan lan egiten duten profesionalak biltzen baitira.

b) EHGLaren esparruan sormenezko lanak egiten (autoreak) eta gero horiek zabaltzen eta irakurzaletasuna sustatzen ari direnak (dinamizatzaile, hezitzaile, bibliotekari...) gerturatzeko balio izango du. Azken hauen formakuntza garrantzitsua da irakurzaletasuna sustatzeko betetzen duten funtzioagatik.

Koordinatzailea: Itziar Zubizarreta

Tokia: Zemoria 25, behea

Herria: Donostia

Data: hilero larunbat goiz bat

Bazkideek doan hartzen dute parte mintegi honetan. Informazio gehiago nahi duenak dei dezala telefono honetara: 943 471 487