Galtzagorri Elkartearen webgunea

liburu-gaztea
Bularretik Mintzora
Liburuen altxorra

Galtzaberri

Bilaketa:

Mariasun Landaren omenezko ekitaldia

Uztailaren 9an, ostegunarekin, ilustrazioa, literatura eta musika uztartuko dituen ekitaldia egingo da Mariasun Landaren omenez Donostiako Aquariumean, Mariasun Landarekin solasean izenburupean. Ekitaldia UPV-EHUko Udako Ikastaroek Etxepare Euskal Institutuarekin elkarlanean antolatutako "Excellence in Basque Studies V" ikastaroaren gerizpean egingo da.

Elena Odriozolarentzat Espainiako Ilustrazio Saria

Elena Odriozolak (Donostia, 1967) irabazi du 2015eko Espainiako Ilustrazio Sari Nazioanala. "Bere ildo berezko eta koherenteari jarraituta berritzeko izan duen gaitasunagatik eta haren lanaren ahalmen narratiboagatik” hautatu du epaimahaiak Odriozola. Saria Espainiako Hezkuntza, Kultura eta Kirol Minsterioak esleitzen du eta 20.000 eurokoa da. Odriozolaren hautagaitza Galtzagorri Elkarteak proposatu zuen, OEPLI osatzen duten atal bakoitzak bere proposamena helarazten baitu Espainiako Sari Nazionalera.

Aņorga eta Mitxelenarentzat Etxepare Saria

Pello Añorga idazleak eta Jokin Mitxelena ilustratzaileak sortutako Munstroek pixa egiten dute ohean album ilustratuak irabazi du 2015eko Etxepare Saria. Hau da bikote honek Etxepare Saria eskuratzen duen bigarren aldia. Pozik jaso dute biek gaur saria.

Marraz(i)Oak topaketetako lanen erakusketa

Aurten Galtzagorri Elkartearen 25. urteurrena dela eta, Ilustratzailearen Txokoa Marraz(i)Oak-en parte hartu dutenen lanen erakusleiho bihurtuko dugu. Donostiako Aiete Kultur Etxearekin lankidetzan Marraz(i)Oak topaketetan urte guzti hauetan parte hartu duten ilustratzaileen lanen erakusketa bat egingo dugu datorren irailaren 19tik urriaren 22ra. Horrez gain, Marraz(i)Oak-en sortutako ilustrazio lanen enkante edo subasta bat egin nahi dugu urtemuga festarekin batera. Bertan lortzen diren funtsak munduan zehar beharrean aurkitzen den haur liburutegiren bati eskaini nahi dizkiogu (Gazako haur liburutegia, Lanpedusako haur etorkinen liburutegia…).

"Alizia"ren euskarazko edizio berria 150. urteurrenarekin

Lewis Carroll idazlearen Alizia herrialde miresgarrian liburuaren 150. urteurrena dela eta, Pamiela argitaletxeak Manu Lopez Gasenik itzulitako liburua berrargitaratu du. Uztailaren 8an aurkeztuko dute Donostian, liburuari buruzko solasaldiarekin. Asun Agiriano, Juan Kruz Igerabide eta Manu Lopez Gaseni ariko dira solasean. 

Leire Urbeltzen lanekin beteko da Ilustratzailearen Txokoa

Ekainaren 17tik irailaren 13ra, Leire Urbeltz irudigile nafarraren lanak ikusteko aukera izango da Aiete Kultur Etxeko Ilustratzailearen Txokoan. Ekainaren 14ra arte Belen Lucasen lanek bete duten txokoan, orain Urbeltzen ilustrazio eta sorkuntza lanez gozatzeko aukera izango da.

Merezitako sariak banatu ditugu

Banatu dira Liburu Gaztea Book Trailer Lehiaketako sariak Koldo Mitxelena Kulturunean. Bertan izan dira Galtzagorri Elkarteko lehendakari Iñaki Markotegi eta Gipuzkoako Foru Aldundiko jarduneko Euskara zuzendari Zigor Etxeburua; lehiaketa antolatzen eta laguntzen duten bi erakundeen izenean. Baita Mirentxu Larrañaga itzultzailea, Aitor Arana idazlea eta Antxine Mendizabal editorea. Eta, noski, saria jasotzera etorri diren Bergarako, Lasarteko, Urnietako eta Donostiako gazteak.

Peru Abarka Lehiaketako ilustrazioak aurkezteko azken egunak

Peru Abarka Album Lehiaketara ilustrazioak aurkezteko epea ekainaren 27an amaituko da. Aurten literatur lanaren irabazlea Leire Arano izan da "Betiko atzo" idazlanarekin. Bada, ilustratzaileek idazlan horrentzako ilustrazioak aurkeztu beharko dituzte.

Marraz(i)Oak VII. deialdia zabalik da

Galtzagorri Elkarteak, Gipuzkoako Foru Aldundiko Kultura Zuzendaritzak babestuta, 7. aldiz antolatuko ditu aurten Marraz(i)Oak topaketak. Gustavo Puerta literatura eta arte adituak eta Elena Odriozola ilustratzaileak gidatuko dituzte jardunaldiak, "Gauzen lezioak" lelopean. Urriaren 19tik 23ra, bost egunez, Donostiako Komikigunean egingo dira topaketa hauek. Parte hartu nahi dutenek, uztailaren 17a baino lehen bidali beharko dute eskatutako lana Galtzagorri Elkartera.

Lazarillo Sarietan izena emateko epea zabalik da

2015eko Lazarillo Sarietan parte hartzeko deialdia egin du OEPLIk, Espainiako Hezkuntza, Kultura eta Kirol Ministerioaren babesarekin. Sariketa honen helburua haur eta gazteei zuzendutako liburuen kalitatezko liburuen produkzioa bultzatzea da. Egun bi sail ditu lehiaketa honek: bata, Album Ilustratuarena; bestea, Literatur Sorkuntzarena. 2.500 euro irabaziko ditu irabazleak kategoria batean zein bestean. Literatur lanak bidaltzeko epea 2015eko uztailaren 15ean amaituko da. Ilustrazioak bidaltzeko epea, berriz, 2015eko irailaren 30ean.

Galtzagorri Elkartea · Zemoria 25, Behea 20013 Donostia ·