Galtzagorri Elkartearen webgunea

liburu-gaztea
Bularretik Mintzora
Liburuen altxorra

Galtzaberri

Bilaketa:

Odriozolak eta Zabalak gaur jasoko dute Urrezko Sagarra

Elena Odriozolak eta Javier Zabalak jasoko dute Bratislavako Ilustratzaileen Biurtekoak munduko ilustratzalerik onenen artean banatzen dituen Urrezko Sagarra sariak. Bi ilustratzaile horien lanak OEPLI-k proposatu zituen (IBBYren Espainiako atalak) espainiar estatuko beste 13 irudigileren lanekin batera. Urrezko Sagarra saria 1.500 $-koa da, baina ia sari ekonomikoa baino garrantzitsuagoa da sari horrek ilustratzaileen artean nazioartean duen prestigioa. Biurteko horretan Grand Prix bat, Urrezko 5 Sagar eta Ohorezko 5 Plaka banatzen dira.

Elena Odriozolak irabazi du Bratislavako Biurtekoko Urrezko Sagarra

Elena Odriozolak jasoko du aurten Bratislavako Ilustratzaileen Biurteteko Urrezko Sagarra Frankenstein (Mary Shelley/Elena Odriozola. Nordika Libros, 2013) lanarekin. Lan hori Galtzagorri Elkarteak OEPLIren bidez proposatu zuen sariketa horretarako, bi urtean behin egin ohi duen moduan. Sari banaketa ekitaldia ostiralean izango da Slovak National Theathre antzokian arratsaldeko 17:00etan eta bertan izango da ilustratzaile donostiarra. Biurteko honetan nazioarteko ilustratzailerik onenen lanak saritzen dituzte eta saririk garrantzitsuenetarikoa da ilustratzaileen artean. Elena Odriozolak aurten Espainiako Sari Nazionala ere jaso du, bere ibilbide osoa saritzen duena, hain zuzen.

Abian da Nafarroako VI. Komiki Jaialdia

Abuztuaren 29an hasi zen Nafarroako Komiki Jaialdiaren seigarren edizioa, eta irailaren 27ra arte iraungo du. Hainbat egilek hartuko du parte bertan, horien artean dira Mikel Urmeneta (aurtengo kartelaren egilea), Gallego y Rey, Bernardo Vergara, Paula Bonet, Aitor Saraiba, Ricardo Cavolo, Leire Salaberria ilustratzaile nafarra eta Fermin Muguruza Black is Beltza komikiaren egilea. Horrez gain, erakusketak eta tailerrak ere izango dira.

Liburutegi berria dute Gazan

Urtea bete da Israelen eraso batek Gazako IBBYren Al-Ataa Liburutegia erabat suntsitu eta Shawka liburutegia hondatu zuenetik. Gazan errealitate gogorra bizi dute oraindik ere, baina zenbait egitasmo berreskuratzeko ahalegin handia egin da. IBBYk, bereziki Palestinako IBBYk, berehala erantzun zuen eta “Children in Crisis situation” ekimenaren barruan, lortu du behin behineko liburutegia (Sikka Library) martxan jartzea.

Bularretik Mintzora egitasmoaz Bratislavan

IBBYren Eslovakiako atalak antolatutako jardunaldietan hartuko du parte Juan Carlos Alonso psikologoak, Galtzagorri Elkarteko zuzendaritzako kide eta Bularretik Mintzora egitasmoko arduradunetako batek. “BULARRETIK MINTZORA”; DEVELOPMENT OF EARLY READING HABITS AND PSYCHOEMOCIONAL STIMULATION goiburu duen hitzaldia emango du berak irailaren 31n, 14:35ean. Hitzaldia streamming bidez ikusteko aukera izango da, baina horretarako aurrez izena eman behar da honako web gune honetan: http://research.seevogh.com.

Julene Azpeitia 28. ipuin lehiaketa

Zumaiako Udalak 28. Julene Azpeitia Ipuin Lehiaketa antolatu du, literatur sorkuntza bultzatzeko asmoarekin. Gaia librea da eta ipuinak, gutxienez, 6 orrialde izan beharko ditu. Lehen saria 3.000 eurokoa izango da. Lanak aurkezteko epea irailaren 30ean amaituko da.

Esperantora itzulitako Patxi Zubizarretaren lanari saria

Aitor Aranak esperantora itzulitako Usoa venis fluge kai Sola kai senvosta liburuak jaso du aurten UEA Universala Esperanto-Asociok (Esperanto Elkarte Unibertsala) urteko haur libururik onenari ematen dion saria. Patxi Zubizarretaren Usoa, hegan etorritako neskatoa eta Bakarrik eta Buztangabe ipuinek osatutako liburua da Aranak itzuli eta saria jaso duena (Usoa, hegan etorritako neskatoa eta Bakarrik eta Buztangabe).

Liburu-sorta ederra eraman dugu Donostia Unibertsitate Ospitalera

Galtzagorri Elkartean urtero pilatzen zaizkigun liburuei irteera duin eta probetxugarria eman nahian, Donostia Unibertsitate Ospitalera joan gara. Bertan, eskolaren ondoan dagoen, ziber-gelan euskarazko haur literaturako liburu-sorta eder bat utzi dugu ikasturte berriarekin han dauden haurrek irakurketaz gehiago goza dezaten.

Galtzagorriren 25 urteak "Behinola" aldizkarian

Aurten, Galtzagorri Elkartearen 25. urtemuga dela eta, aldizkari berezia da 2015eko lehenengo hau: Behinola 31. Euskal Herriko Haur eta Gazte Literatura Elkarteari buruzko monografikoa osatu dugu. Mende laurden honetan egindako guztia edo ia guztia jaso nahi izan dugu, bai hitzez, bai irudiz. Elkarteari buruz inoiz bildu den informaziorik osatuena dela esan genezake; zer den, zein helburu duen, zer egiten duen, eta nork gidatzen duen jakiteko ezinbesteko "gida".

Mirein Asiainenk irabazi du Ilustrazioaren VI. Katalogo Iberoamerikarra saria

Miren Asiain Lorak (1988, Iruñea) irabazi du Ilustrazioaren VI. Katalogo Iberoamerikarra saria. 19 herrialdetako 788 ilustratzaileren artean hautatu dute Asiainen lana. Berearekin batera, 33 ilustratzaileren lanek osatuko dute orain Ilustrazioaren VI. Katalogo Iberoamerikarra.

Galtzagorri Elkartea · Zemoria 25, Behea 20013 Donostia ·