Galtzaberri
Ikasten jarraitzeko makina bat aukera daude udazkenean
Udazkenarekin batera hasten da ikasturtea. Eta ikasturtearekin batera ikaste aukerak bideraktu. Irakurzaletasunaren sustapenaren inguruko hainbat jardunaldi eta ekimenen inguruan ikasteko para eskainiko digute besteak beste, irailaren 27an eta 28an Ermuko Udal Liburutegiak eta Eusko Jaurlaritzak antolatu dituzten "Irakurketa udalerrian: erronkak eta etorkizuna" jardunaldiek. Urriaren 14an eta 15ean Iruñeko (Nafarroa) Civivox Condestablen "Irakurzaletasuna Sustatzeko Esperientzak Elkar trukatzeko II. Jardunaldiak" antolatu ditu FIRA taldeak. Besteak beste, Gustavo Martin Garzo izango dutelarik gonbidatu. Eta urriaren 21etik 23ra bitartean berriz, "Istorio txikiak, mundu handiak" izeneko jardunaldiak burutuko dira Bilboko Alondegian, Alondegiak berak eta Ibaizabal argitaletxeak antolaturik Galtzagorriren lankidetzarekin.
Galtzagorri oporretan, baina liburuek ez dute oporrik hartzen
Abuztuaren 9tik 23ra arte Galtzagorri Elkarteko bulegoa itxita egongo da. Oporrak hartuko ditugu, deskantsua hartu eta bueltan "pilak" kargatuta itzultzeko. Beharko dugu. Hurrengo ikasturtea, ikasturte potoloa, ekimenez betea izango baitugu. Besteak beste, Santiagoko IBBYko biltzarra dugu irailean, urrian Bilboko Alondegian gauzatuko diren "Istorio txikiak, mundu handiak. Haur eta Gazte Literatura ezagutuz" jardunaldietan parte hartuko dugu. Azaroan Marrazioak 2.a burutuko dugu, Ignasi Blanch eta Harkaitz Canoren laguntzaz.Tartean, urteroko ikastaroa prestatuko dugu, irakurketa klubak martxan jarri, Irakurketa mintegia bideratu, Bularretik Mintzorarekin jarraitu, Liburuen Altxorra eta Liburu Ibiltariak bideratu... eta beste zenbait proiektu ditugu esku artean. Pixkanaka ezagutzera emango ditugunak. Sorpresari ere lekua utzi behar zaio eta.
Dena den, ez gaitezen agobia oporretan joan baino lehen. Gu oporretan izango gara, baina liburuak ez doaz oporretan. Edo badoaz, baldin eta gurekin eramaten baditugu. Baina eurek ez dute oporrik hartzen, hor daude, beti ere guk irakurtzeko prest eta guk gure txikienei kontatu eta irakurtzeko prest. Segidan, udan irakurri dezakezuenaren inguruko zenbait pista. Gozatu!
Santiago gertuago dago
Irailaren 8tik 12ra bitartean burutuko da Santiagoko (Galizia) IBBYko 32. Nazioarteko Biltzarra. "Gutxiengoen indarra" lemapean mundu guztian Haur eta Gazte Literaturaren esparruan lanean dabiltzan profesional eta adituak bilduko dira bertan. Galtzagorriko delegazio bat ere joango da. Horrez gain, Kultura Ministerioak lagundurik, Espainiako Estatuko hizkuntza guztietako Haur eta Gazte Literaturan lan egiten duten hainbat autore eta ilustratzaileen erakusketa prestatu du OEPLIk, bere atalekin lankidetzan. Erakusketa honetan, 8 euskal ilustratzaile eta 6 euskal idazleren lanak ikusi ahal izango dira.
IBBYko kongresu hau Espainiako Estatuan egiten dela aprobetxatuz, IBBYko agerkari nagusi den Bookbird aldizkariak ale berezia prestatu du. Ale honek Espainiako hizkuntza ezberdinetako Haur literaturen bilakaeraren berri bildu du. Ingelesez, ohi bezala. Baina gaztelaniaz ere kontsultagai daude bertako artikulu guztiak. Ez hori bakarrik, jatorrizko hizkuntzan ere bai. Horregatik, euskaraz aurki daiteke IBBYren web gunean Xabier Etxaniz Erlek euskal haur eta gazte literaturari buruz Bookbird-entzako egin duen artikulua.
Haur eta Gazte Literaturako White Ravens Festival jaialdia egingo da lehenengo aldiz Munichen
Uztailaren 20an hasi eta 25a bitarte White Ravens Festival Jaialdia burutuko dute Municheko Nazioarteko Haur Liburutegian. Mundu guztiko idazle eta ilustratzaileak izango dira bertan, euren esperientziak agertuz. Esperientzia handiko autoreak eta hasi berriak direnak bilduko ditu Jaialdi honek, haur eta gazte literaturari eskainitako liburutegi handienaren inguruan.
2009-2010eko Liburu Gazteak eta 2010eko Idazle Gazteak
Dagoeneko badakigu zein diren 2009-2010. ikasturteko Liburu Gazteak. Maiatzaren 15ean amaitu zen Gipuzkoako DBHko ikastetxeek bozketa egiteko epea. Irabazleak honakoak dira: DBH1ean Eric-Emmanuel Schmitt-ek idatzi eta Miren Artetxek itzulitako Oskar eta Andre Arroxa (Elkar); DBH2an, Jokin de Pedroren Irurac bat (Elkar); DBH3an, Juan Madrid-ek idatzi eta Koldo Bigurik itzulitako Hegoalderantz ihesi (Giltza); eta DBH4an Agatha Christiek idatzi eta Xabier Aristegietak itzulitako Hilketa lokartua (Igela).
2010eko Idazle Gazteak ere aukeratuak izan dira dagoeneko. Eta datu bat: aurtengo idazle gazte guztiak bat salbu neskak dira. Ipupomamua telebista saio berezi bat egingo da ekainaren bigarren astean Liburu Gaztea eta Idazle Gazteako aurtengo ekitaldiaren inguruan. Bertan ezagutu ahal izango dituzue zuzen-zuzenean irabazleak.
Bai Idazle Gaztea bai Liburu Gaztea Galtzagorri Elkarteak antolatzen dituen egitasmoak dira, Gipuzkoako Foru Aldundiaren laguntzari esker.
FGSRen Haur eta Gazte Literaturako Liburu Hautatuen Gida aurten Interneten
Dagoeneko eskuragai dago 2008-2009. urteko Haur eta Gazte Literaturako Liburu Hautatuen Gida. Eskuragai dago, baina Interneten, aurten, lehenengo aldiz, ez baita paperean kaleratuko. Egoera ekonomikoak bultzatuta, Interneten helbide propioa du orain Haur eta Gazte Liburuen Hautaketa Sareak: http://www.reddeseleccion.com. Bertan, 2008-2009. urteko azken gida aurkitzeaz gain, aurreko urteetako gidak kontsulta daitezke, modu ezberdinetan gainera.
Haur eta gaztetxoen irakurzaletasuna sustatzeko proposamenak lantzeko mintegia egingo da uztailean Donostian
Galtzagorri Elkarteak "Irakurzaletasuna sustatuz: Haur eta Gazteentzako Liburuen hautapena eta balorazioa" izeneko mintegia antolatu du uztailaren 26, 27 eta 28an Donostian. Mintegia EHUko Udako Ikastaroen baitan burutuko da eta bertan kulturan eta hezkuntzan haur eta gazteen irakurzaletasuna pizteko proposamenak lantzen dabiltzan punta-puntako profesionalak bilduko dira. Dagoeneko zabalik dago mintegi honetan parte hartzeko bekak eskatzeko epea.
Vitoria-Gasteiz sarietara aurkezteko epea ekainean bukatzen da
Haur eta gazte literaturaren alorrean euskarara egindako itzulpenik hoberenak saritzen dituen Vitoria-Gasteiz saria apirilean argitaratu zen. Ekainean amaitzen da 2009. urtean haur eta gazte literaturaren alorrean euskaraz argitaratutako itzulpenik hoberenak saritzeko ematen den sarira lanak aurkezteko epea. Euskarazko haur eta gazte literaturako itzulpengintza saritzen duen lehiaketa bakarra da honakoa. Bi sari ematen ditu, bakoitza 9.000 eurotakoa.
Joxantonio Ormazabal idazle eta editorea hilda aurkitu dute
Joxantonio Ormazabal hilda aurkitu dute bart gauean mendialdean. Ormazabal orain 29 urte hasi zen haurrentzako editore lanean Elkar argitaletxean eta duela urtebete hartu zuen erretiroa. Liburu andana argitaratu ditu euskarazko Haur eta Gazte Literaturan, azkena, lehengo ostegunean aurkeztu zuen: "Ehun ipuin hitz gutxitan". Galtzagorriko kide zen aspaldidanik.
Andersen sarien eta Asahi Sarien irabazleak eta finalistak
David Almond egileen atalean eta Jutta Bauer ilustratzaileenean dira 2010. urteko Hans Christian Andersen Sariaren irabazleak. Boloniako Haur Liburuaren Nazioarteko Azokan eman zituzten aurtengo saridunen izenak ezagutzera, baina saria Santiagon jasoko dute irailaren 11n, bertan egingo den IBBYko Nazioarteko Biltzarrean. Biltzar berean, irailaren 10ean egingo den ekitaldi berezian, banatuko dira baita ere aurtengo IBBY-Asahi Reading Promotion Sariak. Bata Ghanako Osu Children's Library Fund-ek jasoko du eta bestea Kolonbiako Convenio de Cooperación al Plan de Lecturak.
Galtzagorri Elkartea · Zemoria 25, Behea 20013 Donostia ·
